عيدية الثورة
كل ثورة وإنتو طيبين
كل ثورة العيد يجينا
وفرحة تكبر وبيها شامخين
كل ثورة نقوم نغني
نملا ساحات الحواري والشوارع وحفلة في كل الميادين
فيها تتكامل حشودا ..
وليها يصدح بالهتاف جمع الميامين
بالجهود نرسم طريقنا
طريق جميل يسع الملايين
والدنيا تعرف أيه قدرنا
ونحن كيف فعلاً مسالمين ..
في سلطة المدنية مبدأ
نرفض الفوضى وسلوكا نشجبا ولازم ندين
وأي واحد ليهو حق في اختيارو
- في حدود حريتو طبعاً –
في عبادتو وإعتناقو لأي دين
طالما في الأصل إخوة وفي الوطن متوحِّدين
نستعين بالوحدة نسمو ..
وبالتحاور نبني دولة وبالتوافق محتمين
طالما ظلَّ المواطن سيد قرارو
والعمل هدفو وشعارو
والضمير للمهنة تأمين
طالما في ضمن سيرتو (زولة طيبة) (وزول أمين) ..
كل ثورة نعيد حسابنا
نجرد الحاصل علينا من عصابة الفاسدين
كل ثورة وناس بلادنا الغالية أرقى وبالسلام مستمسكين
وبالوئام والإلفة تامِّين
وبالنفوس الراضية لامِّين ..
وكل ثورة وإنتو أجمل
وإنتو أروع
وإنتو حلوين.
محمد حســــن الشيخ
الرياض أغسطس 2019
عيد الإضحى المبارك
