خازوق عيد ميلادي
اول مرة اتخوزق بقصة عيد ميلاد دي كانت وانا في تانية ثانوي، انا زاتو اصاحب اولاد الناس المرتاحين ليه؟ أظنه السبب المدرسة.
في الابتدائي ياها مدرسة الديم شرق واحد الابتدائية، كلنا اولاد الديم.. حي شعبي ما شغال بالفنكهة بتاعت ميلاد دي، مش كفاية ولدوك وزدت عليهم البلاوي؟..
الثانوي العام كانت مدرسة الاتحاد، وما كانت بتختلف كتير عن الديم.. برضنا طلبة نفس المدارس الابتدائية الشعبية الغلبانة ديك، خمخمونا حشرونا في المدرسة دي.. سيم سيم.
الثانوي كان هو الفرق..
الخرطوم الجديدة لمت كل الناس.. كل أحياء الخرطوم، من كل الطبقات.. اولاد عمال على اولاد افندية على اولاد برجوازية على اولاد تجار على اولاد زعماء سياسيين و و.. اتصاحبت الناس واختلطت و و.. قاموا أصحابنا التراطيب دخلونا معاهم في ثقافات وحاجات وتفانين جديدة علينا ولاسمعنا بيها ولا بنعرف ليها.
المهم في تانية ثانوي دي ساقوني اصحابي اولاد العز ديل يوم ١٤ تمنية ده وظبطو لي سهرة بت كلب في بيت واحد منهم في العمارات.. وحصلت الحنابيك والمزازيك والشموع والبهجات وانفخ ما تنفخ و make a wish.. وغنوة هابي باتي الما عرفت كلماتها شنو إلا بعد سنييييين لما احتفلنا بأول عيد ميلاد لتسنيم بتي.. وكان احتفال جبرية وزندية ساكت وعنقدة من امها، أنا بتاع عيدميلاد؟ فالقاعدة الشعبية بتقول: (شهراً ما عندك فيهو نفقة ولا تحسب أيامه).
اصحابي اولاد العز ديل اليوم داك أكرموني وادوني كم هدية.. منها واكتشفت انه اهلي ديل ظالمني ظلم الحسن والحسين.
المهم اليوم داك اتكيفت وفرحت فرح، نفس فرحة انك عريس ديك وتتبسم زي الكضاب وخجلان خجلان كده ومعاها هنجكة لذيذة.. في نفس اليوم داك خربت اول خربة، اتعلمت فيهو شراب السجاير وداك الاسموشنو.. و ايييييك وانت طالع.
المهم..
هسه اسوي شنو مثلا لاصحابي الحلوين الفتحو كم بوست وباركوا لي العيميلاد هنا ديل بعد ما تبت وبقيت ورع وتقى وحشيم البتة وعلى مستوى الهناي؟ ابوظ ليهم تاني وانكص وارتد؟
على حس هذا الفرح الماليني في هذا اليوم التليد من تاريخ قواتنا المسلحة.. يصرف واحد قدوم اصلي حار لكل صاحب وصاحبة أكرموني بكلام حلو جهجاه.. صرف من طرف لمن اعمل ليكم كتمة نفس.
أما كل الأصحاب والصاحبات الكتبوا ولو حرف واحد تهنئة ومحبة.. ديل ليهم حضناية ولبة وشيل في الراس وغوبلات وحب كبير وامتنان..
الله يسعدكم ويديكم ألفي مرادكم ويريحكم ويخليكم فوق راسي ده.
محبات كتيرة.
