من دفاتري القديمة

تربال ولا أبقى وزير إنقاذي

صورة لجانب من مشروع شياخة موركة بجزيرة صاي في الشمالية
  • 18 يناير 2018
  • لا توجد تعليقات

سيد مراد

* تشكراتي للشابه اللي رفعت من معنوياتي برسالتها (انت تستحق تكون وزير) قلت لنفسي طيب لو بقيت انا وزير معناتو بقبت امير..اهااا طيب منو اللي حيسوق الحمير ..؟!

* نشطت النفس الامارة بالجشع ترسم لي لوحه مخمليه بنفسجيه( فيللا في سوبا وضيعه في كافوري وشركات وعمارات شاهقات في سنتر الخرطوم ومثني وثلاث ورباع وسفريات ونثريات بلا سقف او حدود..وفارهات لبعلولاتي السمحات وللابناء وللبت الاموره الدلوعه تسبي العيون مع مجانية البنزين والجاز لزوم الوظيفه ورددت بسري ( خمسه وخميسه علي العيون الحااره) * غرقت في بحر احلامي وجرفتني تيارات مده بعيدا.. قلت لنفس يا زول ما تمش وشوف صديقك القديم الدفعه الوزير الانقاذي ذائع الصيت بلدينا طه الفنجري تستفيد من خبراتو في فنون الهبش واللطش ..لكين المشكله من ايام سكن الداخليه في المدرسه الاولبه ما اتلاقينا .. طه كان صاحبي وولد غلبان زيي بس الفرق بيناتنا كان بصراحه انا كنت شاطر وهو كان بليد وما يخلي الطيش وكان البساط احمدي بيناتنا نتبادل اللبسات منوالطاقيه حد المركوب لمن تكون في مناسبات عرس في الحله..

* وقفت قدام المرايا اتهندم ساعه عشان اختار اللبسه اللي بتليق في مقابلة سعادة الوزير وتوكلت على الله ومشيت ازور زميلي القديم الدفعه .. يا زوول طرت من الفرح لمن لقيت سياره فارهه قدام باب قصره الفخم .. يعني معناته اكيد سعادته موجود .. متردد اقدم رجل وأأخر رجل خبت ع الباب وفتحت لي شابه وقفت تعاين لي فوق تحت لامن خجلت وقالت لي (سوري “بابي” ما موجود يمكن يكون في مزرعتنا في الكافوري..) سألتها بفضول..طيب السيارة دي حقت منو والكافوري دي زاتا بوين؟ ابتسمت وقالت : دي سيارة (مامي ) والكافوري الحته اللي الرئيس ينوم فيها .. ورددت بعفويه بسري ..الريس زاتو ..!!

* ويا زول كل يوم امشي لزيارة الوزير طه الفنجري والقي السياره الجميله اللي تسر الناظرين وما القي سعادته والقي قدام الفيلا سيارات فارهات (ترقش) ببهرجه..

* طلع في نافوخي انو لازم اقابل الوزير وعشان كدا قررت الازم باب فللته ..اهاا بوم بزهج خبطت على الباب شديييد وما في زووول جاء فتح لي.. وانا متسمر قدام الباب جاء ود (حنكوش ) من جيران الوزير وقال لي: (سوري عموو ..خالوو طه مسافر امريكا) قمت سألته بفضول وطيب السيارة الجميله الواقفه قدام بيتو مش حقتو ؟ ضحك الحنكوش كتير لامن احترت وشكيت اكون قلت لي نكتة بتلقائيه وتكون عجبته وقال:(خليك معاي شويه عمو السيارة دي حقت الخدامة الحبشيه وديك بتاعة الخدامة الماليزيه .. وديك .. وديك .. ولمن وصل الحنكوش( للديك العاشر) قلت ليه ( شكرا يا ابني) ضحك الحنكوش وقال (دا انت زوول عسول يا عمو يا عمو) ضحكت وانا اردد بسري اهاا يا تربال طلعت (زول عسول يا عمو با عمو) ..

* وانا كعادتي رابض قدام باب قصر سعادة الوزير ( الدفعه زميل الطفوله)فجاة يوم وصل بموكبه الفخيم ..سعادته عاين لي سمح في وجهي وهو يتمدد باسترخاء في السياره وفرحت شديد انو عرفني..ولكن يا فرحه ما تمت .. اااخ بصوت عالي جرح كبريائي في مقتل وهو يقول لمرافقه ((تصور انا كنت قايل اخونا دا اترم بدري) رفيقه قهقه طويلا لنكتة الوزير البايخه.. زعلت انفحرت شراييني بغضبة ترباليه..تحسست جسمي لاتاكد انو انا حي واللا من زمان ميت وما عارف زي ما قال الوزير الحيوان الدفعه طيش فصلنا زمان والوزير الانقاذي هسي..

* من غيظي كتبت للشابه فورا من قدام باب الوزير الطيش ..((شكرا يا غااليه.. انا غاوي فقر.. انا اخير ابقي اي شئ اكسب قوتي بالحلال ولا ابقي وزير انقاذي حرامي اسرق قوت الغلابا.. انا ما اخفض مستوي شرفي من تربال شريف الي مستوي وزير حرامي.. يلا بلا وزير بلا بطيخ …

الوسوم سيد-مراد

اترك تعليقاً

لن يتم نشر عنوان بريدك الإلكتروني.