رصد الحراك الثوري (الاحد 21 نوفمبر 2021م)
✍🏼 : مهادن الزعيم
✵ من الصباح الشوارع هادئة والحركة ضعيفة شديد مع انو الليلة يوم الاحد بداية اسبوع العمل في اغلب المؤسسات لكن الناس كانت في حالة ترقب للمليونية المعلنة …
✵ لجان المقاومة خططت لي انو المليونيات تكون في كل مكان بعد خبر إغلاق الكباري ودا الحصل حرفيا .. الساعة 1 بالضبط انطلق موكب ضخم جدا من جاكسون واتبع المسار المعلن نحو القصر واتعرض لقمع كبير بالبمبان وقنابل الصوت في شارع القصر واتراجعو ناحية شروني …
✵ القوات الامنية لحقت الموكب في شروني وبرضو قمعتو واتواصلت عمليات الكر والفر بين الثوار والقوات الامنية في الاحياء القريبة من السوق العربي …
✵ في امدرمان اتحرك الثوار في الوقت المحدد بحشود كبيرة غطت شارعي العرضة والاربعين والهتافات كانت سما والحشود خرافية …..
✵ الساعة 2:45 دقيقة بدا القمع الغريب علي الثوار من قبل الشرطة بالبمبان والقنابل الصوتية مما حدا بالثوار بالتراجع الى داخل الاحياء مع تتريس كامل لشارع الاربعين …
✵ اغتنمت القوات الامنية الفرصة وهاجمت الثوار في شارع العرضة بقوة واجبرتهم الى التراجع الى استاد المريخ وبعدها استعاد الثوار سيطرتهم ونجحوا في السيطرة علي شارع العرضة من الصهريج لحدي 100 من صينية التجاني الماحي…
✵ استعملت الشرطة القوة المفرطة في قمع ثوار شارع العرضة عن طريق مدرعات البمبان فأتي المدد من موكب قادم من اتجاه سوق امدرمان فجن جنون الشرطة واستعملت الرصاص الحي تجاه الثوار وسقط الشهيد يوسف عبدالحميد (16) سنة برصاصة في الرأس …
✵ استمرت عمليات الكر والفر بين الثوار والقوات الامنية الى حلول الليل واصيب عدد كبير من الثوار بالرصاص الحي والبمبان …
✵ في الخرطوم احتشد الالاف في شارع الستين في مومب مهيب وفي ذات الوقت كانت هناك مواكب اخرى في كل من الصحافة زلط محطة 7 وحجازي وحديقة القرشي …
✵ في بحري تعددت المواكب فكان هناك موكب في شمبات بالقرب من السوق المركزي وموكب ضخم الموسسة وموكب اخر اتجه الي منزل الشهيد هزاع (له الرحمة) …
✵ في ذات الوقت كانت هناك مواكب اخرى لاتقل ضخامة في كل من شارع الوادي بالثورات والجريف شرق …
✵ في الخرطوم اطلقت الشرطة الغاز المسيل للدموع داخل مستشفى الخرطوم التعليمي ووسط المرضى دون مراعاة لحالاتهم الانسانية ….
✵ في الولايات خرجت مواكب ضخمة جدا في كل من بورتسودان وربك وكوستي ومدني ورفاعة مع متاريس في الشوارع واتعرضوا للقمع وبرضو كانت في وقفة إحتجاجية في الدويم …
✵ اثناء الموكب وتحت القمع والرصاص الثوار عرفوا انو حمدوك وقع اتفاق مع برهان وحميدتي … اتفاجأو للحظة وبعدها هتفوا بصوت واحد (حمدوك يا ني الشارع حي) …..
✵ معظم لجان المقاومة بعد رجعوا من المواكب شايلين المصابين والجرحى طلعوا بيانات بتتكلم عن انو اتفاق حمدوك مع العسكر لايعنيهم في شئ وماضون في جداول تصعيدهم الثوري ….
✵ الرحمة والمغفرة للشهداء وعاجل الشفاء للجرحى (ماتنسوهم دسوهم في دعواتكم) والثورة مستمرة وغربال الثورة شغال …
موكب25نوفمبر
سلام ومحبة
