عبدالوهاب هلاوي يواسي “كسلا “

عبدالوهاب هلاوي يواسي “كسلا “
  • 22 سبتمبر 2018
  • لا توجد تعليقات

شعر: عبدالوهاب هلاوي

كسلا كفاره وسلامه
عين وصابت
نجمه غابت ..
في الجبل حزنت غمامه

كسلا كفاره وبريه
للازاهر .. للخمايل
للشوارع ..للمنازل
للصباحات النديه …
للمساجد .. للماذن
للمتاجر .. للمخازن
للمخابز ناره حيه …
للخلاوي .. وللمدارس
للفنادق .. والعرايس
وللاماسي المخمليه …
للافندي الدابو راجع
للمعلم .. والمراجع
لي عيون طفله بتراجع
واجباتها المدرسيه ..
كسلا كفاره وبريه ….

كسلا اسف يا اخي جدا
لي جراحك .. لي مصابك
هل يحوز من غيمه راحله
ومن عيون الموج عذابك
وكان زمان كاتلنا عسلك
ومن عيون توتيل شرابك ..
كسلا اسف يا اخي جدا

يا الحسن ليك استغاثه
كسلا تنجد لي ناسا
الغمام يغسل دموعا ..
النسيم يرفع فروعا
رحمه لي يوم القيامه

كسلا كفاره وسلامه
حبي ليك لو كان بكفي
كان مليت من دمعي كفي
وطرت بيك في الجو يمامه ..

شن اقول وانا كلي حسره
الصبر يا كسلا حبه
ان بعد العسر يسرا
ويا الحسن ليك استغاثه
كسلا تلحق لي ناسا
الغمام يغسل دموعا
والنسيم يرفع فروعا
رحمه لي يوم القيامه

كسلا كفاره وسلامه
عين وصابت
نجمه غابت
في الجبل .. حزنت غمامه ……

عبدالوهاب هلاوي

التعليقات مغلقة.