الكورونا عابرة للقارات: اخدو الموضوع جد جدا

 الدكتور محمد فضل الله

كلية الصحة العامة وصحة البيئة، جامعة الخرطوم

سلامات أحبتي أرجو قراءة هذه الرسالة والتكرم بإيصالها لأكبر عدد ممن نعرفهم.

اول حاله كرونا خلاص اتسجلت في السودان يبقي الكورونا بقت امر واقع.

الكورونا ابدا ما مزحه ولا حاجه بيستهينو بيها.. الكورونا ما حمى الكنكشه او كوليرا بتنتقل بي طرق محددة وبتكون محصورة في مكان واحد.

الكورونا لو لمست حاجه كان لامسها زول قبل مصاب انت حتمرض.. لو وقفت في حته فيها زول مصاب انت حتمرض.. لو انت جنب زول مصاب وهو عطس انت حتمرض.. لو انت دخلت بيتكم وانت عيان كل الفي البيت حيمرضو.

لو ناس البيت مرضو وجوكم الجيران والاهل يطايبوكم… الاهل والجيران برضو حيمرضو.. ولو الاهل والجيران مرضو الحله كلها حتمرض.

دى إيطاليا بتشتكي من الكورونا، وهي بلد عندها إمكانيات ومهيأة طبيً احسن مننا مليار مره وبعد دا اتجهجهو وخشو في الاضيق من الفتيل… بما انو الفتيل بقي المقياس الايام دي.

شفتو السعوديه قفلت بلدها كيف… دي وصلت مرحله انها حتى للخلايجه إخوانهم الهم مع بعض بالسنين والدينين قطعتو معاهم، وقالت ليهم معليش كل زول ياكل ناره.. وقفلت مدخلها في وش دول الخليج كلها وتقريبا وش العالم كله ودا كلو كدرء وبائيات وإجراءات احترازيه من الكورونا.. وبعد دا الاصابات وصلت تقريبا ١٠٠ حالة..

طيب اوريكم بطريقه بسيطه حسبه الانتشار كيف علشان تتخيلو الوضع شنو.. قبل يومين في مصري مصاب دخل السعودية (مكة) حاليا المصابين من المخالطين للمصري دا وصلو كم وأربعين بني ادم ودا في يومين بس.

يعني اي زول جي سلم عليه أو كان في مكان حواليه لحدي ما الحكومة عرفته وعزلته مرض.. اتخيلتوها.. حسبتوها.. الكلام وقع ليكم.

يلا نجي للكلام المر.

احنا بنيتنا الصحية صفر حرفيا ما عندنا مستشفى مؤسس.. ما عندنا غرف عناية.. ما عندنا معدات.. ما عندنا أماكن عزل حرفياً.. ما عندنا ولا حاجة.. لا جوه الخرطوم والاكيد ما في بره الخرطوم.

بمعني لو الكورونا انتشرت في السودان خلاص الهوا ضربنا وكلنا حنموت واحد واحد.. لانو اساسا ما عندنا شي نوقفو بيها أو نحصرو بيها خلي نعالج.

رئيس وزراء بريطانيا طلع في مؤتمر قال استعدو لي وداع احبائكم… دى بريطانيا بجلاله قدرها قالت كده احنا حيكون موقفنا شنو..

إيطاليا الهي احسن مننا مليار مره وصلت مرحله انها بقت في مفاضلة انو تاني اي مريض عمره ٦٥ سنه ما يعالجو لانهم ماعندهم ميزانية ليه المرض انتشر لدرجه بقت مفاضلة مين يتعالج ومين لا.

إيطاليا الاحسن مننا بي مليار مره قالت اي زول عمره ٦٥ وما فوق ما عندنا ليه شي ياكل ناره يا بقي كويس من نفسه يا مات الله يرحمه… إيطاليا قال العندنا بنعالج بي الصغار.. شفتو دا.

احنا ما عندنا ولا حتى البعالج الصغار خلي الكبار..شفتو احنا مقبلين علي شنو ..اي نسيت.. حنك انو اصحاب البشرة السمراء ما بيمرضو دا حنك فاضي.. والافضى منه حنك انو الفايروس بيموت بالحر.

احر من السعوديه ما في.. وهداك الفايروس حايم فيها سداح مداح.. يبقي ناخد المواضيع جد وما نهظر بيها لانو الموقف جد ما بيستحمل الهظار..

طيب والعمل والحل شنو واحنا ما عندنا الممكن نعملو.. حلنا وااااااااحد ما في غيره..انو المرض ما ينتشر عندنا علشان اصلا ما نخش في حتت نعالجو ونعزله كيف.

طيب ما ينتشر عندنا كيف؟

تخيل

ما بنتشر بي حل واحد وعبيط بس لازم يحصل.. بيتحل بننا نبطل نبقي سودانيين مجاملين وبتاعين موضعه.. بمعني

بيوت بكيات لا

بيوت أعراس لا

جيتوني ومشيت ليهم لا

جاملتني وجاملتك لا

حتجاملو بعض حتموتو

جبنات لا

تمرين كوره لا

صف عيش لا

صف بنزين لا

زحمه مواصلات لا

واوعكم تسمعو بي زول مرض تخمو بعض وتتكسرو في المستشفى.

بالعربي البسيط اي حاجه بتلم ١٠ بني ادمين مع بعض ابعد منها مهما كانت هي شنو

حياتك حتقيف.

ومالو أحسن حياتك تقيف، ولا حياتك تنتهي صح.

اوعك تقول صاحبي ما عنده وتكون ثقه (انا الليلة اختي بت امي وابوي جات من السفر اخوي الهو برضو ود امي وابوي ما سلم عليها في يدها… في اكتر من كده).

اقفل بابك عليك انت وأهلك ما تطلع الا الشديد القوي.. مضطر تطلع شغل اطلع ما مشكلة.. اكل عيش والمعايش جبارهة.. لكن ما تسلم ما تتكل على الحيطه.. ما تهبش حاجه الا اذا لازم وضروي انك تهبشها.

عايز تتونس اضرب تلفون لكن لمات العصر لا.. خلي حركتكم في أضيق الحدود..

واخدو الموضوع جد.

احنا لو الكورونا اتفشت عندنا .. منديل نعالجو بيها ما عندنا.. وما حتقيف مننا الا تكملنا كلنا… ومنظمه الصحة العالمية ما حتعمل لينا اي حاجه.. لانو دا وباء عالمي ما حاجه محدوده في بلد واحد فما عندها ميزانيه لي زول.

يبقي الحل الوحيد انها ما تتنتشر.

اقفلو بابكم عليكم.. واخدو الموضوع جد جدا

فهمو المعاكم اننا مقبلين علي شنو.