الهادي حسن احمد “يا سيدي دينك كم” ؟

  • 24 سبتمبر 2021
  • لا توجد تعليقات

عاطف عبدون


● لو سألوني منو اكتر زول اشتغل واتفرغ واجتهد عشان النوبه تاريخها ومستقبلها، بدون أي تردد حقول ( عبد الهادي حسن احمد ) نعم كتار غيرو قدمو حاجات كتيره لكن مافي زول قدم عمرو كلو منشغل بالهم النوبي، تعرفو يعني شنو عمرو؟
يعني انو الهادي ما عمل أي شي في حياتو منذ سبعينيات القرن الفات لحد الآن ما عمل أي شي لنفسو وما كان فاضي لأي شي غير العمل النوبي ومازال ما بيعمل أي شي حتي الآن .

● علي المستوي الشخصي جدا مافي زول انا مدان ليهو في دروب الوعي والمعرفه اكتر من ما انا مدان لي الهادي حسن احمد، فـ الهادي هو أستاذي الأول علي مستوي أي شي بتعلق بأي شي نوبي، الهادي هو الزول الفكيت في بيتو امييتي النوبيه واتعلمت في مدرستو حاجات كتيره ما نوبيه فقط بل في الوكت داك حيث لا كنا بنعرف إنترنت ولا كان في شي اسمو (قوقل) وكتها الهادي كان هو ( قوقلي ) الشخصي ف الهادي زول مطلع بشكل لايمكن تخيلو ويكاد يكون أكثر انسان قاعد علي كم معرفي مر علي في حياتي ف الهادي لمن يتكلم عن الشعر الجاهلي بفتكر انو دا تخصصو الما بعرف غيرو ولمن يتكلم عن البارسايكولجي بتقول انو عالم في المجال دا ولمن يتكلم عن الحضارات تقول الزول دا جاي من زمن تاني فهكذا انا كنت بستغل وجود الهادي في أمسيات الكلاكله بتحويلو لمحرك بحث بقوقل عبرو الشعراء والكتاب والفلاسفه والبلدان والحضارات والثقافات والعلوم وكان بيحكي عن كل شي بوعي المتخصص فيهو ، الهادي انسان مطلع بشكل كثيف وخرافي لدرجة انو الواحد بحتار في انو من وين وكيف لقي زمن يطلع علي كمية الحاجات المختلفه دي بالعمق دا .

● طيب عشان الناس ما تفتكر انو عاطف دا بشكر في الهادي عشان هو عندو فضل عليهو داير أخت كم نقطه اساسيه عشان كل نوبي يعرف انو هو مدان لي الهادي زيي.

☆ واحد

كمية التراث الشفهي الجمعو الهادي من كل مناطق النوبه من جنوب دنقلا الي عمق النوبه المصريه كل الأغاني والحكايات والامثال كل الطقوس والمفردات المندثره الجمعها الهادي عبر ترحالو من قريه لي قريه بي مسجلو دا كنز نوبي لا يضاهي بأي ثمن .

☆ اتنين

كتابات الهادي حسن احمد التي لم تر النور بعد كتبو التحت الطبع ودراساتو ومحاضراتو القدمها ثم اسهاماتو الواضحه كأحد أهم المراجع لعلماء اللغات والتاريخ والحضارة الغربيين المشغلين في مجال البحث عن الحضاره النوبيه حيث كان ومازال الهادي يشكل أهم محطه لكل الغربيين البمرو علي النوبيه فهو الباب الخلفي لكل الحاجات المبهمه وما مفهومه، فقد اقول انو كتير جدا من ما تم انجازو منو قبل غربيين كان الهادي جزء أساسي فيهو . وقد يقول قائل ونحن الحاجات دي حتقيدنا متين ؟ بحب اقول في الحته دي انو الاسرائيليين مثلا لمن جو ياسسو دولتهم من اوائل الحاجات العملوها انو طلعو المخزون اللغوي الفي الكتب وفرغوهو وخلو الحياة تدب في لغة كان ميته وبفضل ناس زي الهادي اليوم اللغه العبريه بقت واحده من اكثر اللغات اهمية وفي فترة وجيزه جدا. وحيجي اليوم اليحتاجو فيهو النوبيين للجمعو والكتبو الهادي ووكتها خيعرفو الهادي عمل شنو ؟

☆ تلاته

المنتوج الأدبي الهادي للاسف هو الاخر لم ير النور وما بعرفوهو إلا الناس القراب جدا منو ولو كل الكتبو الهادي اتحرق في ثانيه وفضل ليهو ( سرقدن دكاي ) لكفاه براهو.
ف سرقدن دكاي بدون أي شك نص ما بتكرر وما بقدر يكررو زول غير الهادي للغة القويه والنقيه العتيقه الكتبت بيها القصيده لدرجة انو الواحد بحتاج مترجم نوبي نوبي عشان يستوعب مفرداتها ف الهادي نفح الروح في كم هائل من المفردات لولا توظيفو ليها في قصيدتو ابدا ما كنا سمعنا بيها.

☆ اربعه ( التفاني والتضحية )

كتار الاشتغلو في العمل النوبي وقدمو كتير لكن كل الناس ديل كان العمل النوبي جزء من الحاجات البعملوهو إلا الهادي ف هو الوحيد الما كان بعمل أي شي غير الهم النوبي لدرجة انو فرغ نفسو تماما وما انشغل حتي بي أساسيات الحياة بل ولمرات كتيره عرض عليهو انو يعيش في دوله اوربيه بعيدا ويستمتع بي حياتو ويضمن علي الأقل معاش نهاية خدمه لكنو رفض وأصر يقعد علي مقربة من ميدان عملو رغم مرضو وكبرو وفقرو كان ومازال ما مهموم بأي شي غير الهم النوبي .

☆ خمسه الوعي

الوعي بالهوية النوبيه والإحساس بيها ما كان موجود قبل جيل الهادي والناس كانت معزوله في جغرافيتها تحت مسميات حلفاويه ومحسي ودنقلاوي والهادي واحد من قلائل النوبيين الاشعلو الشمعه الاولي للهويه المشتركه حيث ببحثو وتوثيقو الشمل كل المناطق النوبيه في مصر والسودان بل وامتد للمجموعات النوبيه غير النيليه زي الميدوب في دارفور والاجنق في الجبال بل ووثق لحركة الإنسان النوبي وهجراتو وتتبع الكيفيه التم بيها استعراب قطاع كبير من النوبيين عبر التاريخ القديم والحديث والهادي لمن بدأ المشوار دا وهو لسع طالب ما كان في قدامو ناس قدمو أي شي ممكن هو يمشي عليهو أو يستند عليهو ورغم ذلك اختار الهادي الدرب الصعب دا وواصلو ولسع ماشي فيهو.

● انا لي بقول الكلام دا كلو طيب ؟

⊙ أولا
عشان “شرف الكلمه” وعشان النوبيين الما عارف منهم يعرف انو مدانين زيي للهادي

⊙ وثانيا
عشان أقدم اعتذار لاستاذي الهادي عن انشغالي وبعدي وتقصيري

⊙ وثالثا
عشان أقول للهادي ياخ لو نحن ساكتين ابدا دا ما بيعني أننا ما مقدرين جهدك وعملك كل الحكايه أننا قوم ما بنعرف نشكر زول ما بنحب نقول لي زول شكرا وهو حي يرزق لكنا منونين ومدانين وشاكرين للعملتو والبتعملو .

⊙ ورابع
عشان اترجي الهادي انو يواصل المشروع الكنا ناويين نبداه وإنو يشرع في تحول كل الكنوز الجمعها طوال حياتو لصيغ قابله للحفاظ عليها عبر استخدام التكنولوجيا القادره تحفظ جهدو لقرون جايه ف د كتير صلاح شرف الدين مازال في الخرطوم وقادر يساعد في حفظ كل العندك بشكل مستدام .

⊙ اخر شي
عشان بس تعرفو قدر كيف الزول دا مظلوم تصدقو لو (قوقلتو) اسمو ما حتلقو ليهو ولا صوره تصدقو ؟
عاطف عبدون

الوسوم عاطف-عبدون

التعليقات مغلقة.