بناءً على ثقافة الاستلاف

جلست تبكى وتتنهف، حتى رق قلبي لحالها
فقلت لها متعاطفاً: مالك؟
قالت ورنة الاسي تعلو صوتها: الود حمادة ده، من قبل الكرونا استلف مني حاجاتي، عدة التصوير حقتي كلها! وقعد يمطوح فيني لمن الكرونا جات، وأنا قربت أموت، ولمن رجعها نصها مافي!
ضحكت بل قهقهت، فقالت وما يضحكك ويقهقهك يا رجل؟
فقلت أحمدي ربك، المثل قال، خمسو ولا لحستو
أقعدي أحكي ليك، حكاية السلف السودانية، في نسختها الأصلية!
فجلست والخوف بعينيها، وقالت لقد ازرى بك الدهر بعدنا، فقلت معاذ الله، و بدأت شجوي، والأسي يعتصرني
زماااان، كنت محباً لفيلم (فوريست قمب)، اول ما نزل الشريط، مشيت فورا لمحل (تاورز) واشتريت نسخة، لسه مقسطر يرقش، 30 دولار الدولار يحك الدولار، مالحقت فرتقت القصطيرة، جاني ابدول جانكوف، زيارة عابرة، سجارتو قصبة، شاف الفيديو مختوت في الطربيزة، و (VCR) بنطط يعمل في التسخينات،… جانكوف بخ لي نفس، بس قطر بخار… وصاح كالمصروع، وبأعلى مافي حلقومه من صوت…يا سلااام طوم هانكس، طلع متين؟؟ يا الله أنا الزول ده بحبو …
ودور ليك فيني، اشحدك مااشحدك، المجد لك، الخلد لك، ما صوت الداعي ينادي يا رجااال، يا صارم القسمات يا حي الشعور……حلف لي قال، اقسمبلاي ( ذي فيرست ثينق إن ذيمورنينق) ارجعو ليك… قلت ياخ من أفرح مسلماً… الخ….وجووووت كسح وهو (يطبق) الشريط…
بعد اسبوعين الشريط ما ظهر، بديت اتوتر، دورت تلفونات ومطاردات، دون جدوى…هسي كان هنا ومرق، سافر بلتمور، مسجون في (تيكيت)، بيطلع بعد تلاتة يوم، مسجون في (سواقة تحت تاثر الكحول)، أدوه ستة شهور، مشى عزا في تكساس، الزمن ماشي، دخلنا على ستنين، والفلم بقى قديم، وتوم هانكس عمل ستة بعده، والشريط سعره نزل لخمسة دولارات، وأنا حالف ما اشوفو إلا في شريطي الاصلي.
الشريط لف علي بيوت عزابة فرجينيا بيت بيت، مرق ميريلاند ومن هناك علي نورث كارولاينا، وسمعت بأنه، رجع دي سي تاني، لاقاني الفاتح، قالي شفنا امبارح فوريست قمب، في فلاديلفيا، لا ياخ بالله ده شريطك الرايح؟.
قمت كونت لجنة تحري من بني كجة عريقين، ومريدين وعطالى، لدراسة خطة، لمحاصرة وانقاذ الشريط، ظلت اللجنة، منعقدة في التشاور،ولمدة سنة أخرى، أطنان من التقارير والإفادات، معظمها طلع فشنك، نفذنا طلعات عديدة، وحق البنزين على، نعمل هجوم علي الموقع، نلقى المتهم، وما نلقى الشريط، نتعشي فول ونمشي….
لغاية ما يوم جاني تقرير..
ويين؟ ..
قالو في واشنطن دي سي، الاباما اڤنيو… يا جماعه لكن الحتة دي الرصاص مدور فيها ليل نهار!، المخبر قال بطريقتك، الزول ده هسي هناك، مع (مرة ورق القرين كارد)، قمت اشتريت ليه مكدونالدس، هدية مني… وقالي لازم تمشي بالليل، والبس الهودي وشيل مسدس، وهو يتمطق بالبيرغر.
(تزعة بالليل)، والواطة برد، وشوف توتي يا المحبوب بدت، ركبت (البرانش افنيو)، وداخل علي (الاباما افنيو)، العمارة اول ما تدخل علي يدك اليمين، مضلمة ومروعة، وفي ركنها الشمالي، جوار البقالة، المترسة بالقزاز المانع للرصاص، زي خمسمية مايك تايسون وتوباك شاكور وباف دادي واقفين، وكل واحد شايل كيس ورق بني، فيه ليترين بيرة، وقفت العربية جاني واحد عضلاتو كور باسكيت، افتكرتو جورج فورمان:
وطس اب وطس اب
شكلك فروم سودان، ما ظنيتك (ديتيكتيف)؟
قلت يس ونو.
قالي عرفتك، بتشبه بوي فريند امي، امي ديبرا البوي فريند حقها من سودان اسمو ابدول جانكوف … جنو فلم فوريست قمب، هسي بكون بحضر فيه، أسمع ما معاك دولار مطرف؟ بخارجك من الشباب ديل، ممكن يعوقوك عادي.
إنت ما بتخجل طول بعرض وتقولي البوي فريند بتاع أمي، أريتك لو مشيت المتمة، طبعا ده مونولوغ داخلي، لأنه ممكن يدق المتمة كلها، وناولته دولار.
قلت لي طيب ما تدخلني عليهم
قالي دقيقة
مشي الانتركوم وكورك
ماام مااام ابدول كظِن إز هير.. ايام هنقري
.الام ردت:
مافي فوود يا لووزر
ليت هيم إن.
بزززززززز الباب فتح
طلعت سلم زي سلالم الاهرامات، كأني في فلم (انديانا جونز)، في اي لحظة تتوقع يلاقيك توت عنخ امون، بنخرتو المعووجة دي، لكن عفصت زي عشرة (كراك هيد) مبطحين فاقدين شبكة. تلاتة طوابق ونفسي اتقطع، أنحنيت في وضع ركوع لمدة خمسة دقايق، لمن حسيت بالام الزهايمر، كوكو كو دقيت الباب
هو از ات؟ كوركت
جانكوف كظن! هف هف هف
الباب فتح والجنزير ماسك
اطل علي وش مرا، اقسمبلاي قايلا حبوبتي حليمة، قفلت الباب تاني وفتحتو بدون الشنكل، وقعدت تكورك
ابدول ابدول يور نيقا از هير، وانت نفسك قايم كدي، ماعندك استامينا؟
برطمت، هوجانكوف خلا فينا مروة
وأنا استكشف الشقة القذرة، بحثاً عن طوم هانكس.
ابدول جاني مارق
وأنا أتميز غيطاً
اوووووووه عزوووو، الشوق بحر…
خش خش ياحبة… فوريست هسي في الحتة المشى فيها ڤيتنام .. مافاتك كتير بحكي ليك الفات، والله كل مرة اقول أجيبو ليك، تحصل حاجة، هو بتاعك مش؟ قربت. اديه في (دنقلو).
خشيت الاوضة ريحتها (ند) وبخور حبش
اخد ليك نفس من الكايا دي يا حبة، رايك شنو في المدام بلاي مش سمحة؟
سمحة الهينة دي، سمح القرين كارد
قمت طلعت المسدس
جانكوف اتخلع، إنت جادي؟
وبصوت جون وين:
خش قدامي طلع الشريط
قالي: نيقا بليز.. المنقة يا حبة
طلع الشريط … تكلمت بطريقة (سامويل جاكسون) و(دينزيل واشنطن) لمن يكونو زعلانين
مية سنة ياخ تخلي اساكك فيك من بلد لبلد؟
.قال ايزي مان، البتعمل فيه ده روبري نيويورك ستايل، (ماغنم فورتي فايف)، مرة واحدة، شيت يا مان؟ دااااااااام!ما يكون غشوك في السعر، لو كلمتني كنت جبت ليك (سيمي اتوماتيك ماشين قن)!!
طلع الشريط قلت ليك
كرك
طلع الشريط وناولني ليه، بحت جيوب الجينز، واداني خمسة واربعين دولار فكة، وخمسين سنت قالي ده العندي…
التكاسة متعودين علي الاستيكب.
عجبتني الفكرة بتاعة الاستيك اب، قلت ليه معقول ده شغل التكسي كلو؟
حلف واغلظ الحلف… والله العظيم.. قاطعته بحدة وحسم
مرتك ككو بس .. شبهك
قالي المقابلة بتاعة القرين الاسبوع الجايي، ادعي لي.
ومن ثم، نزلت جري
لاقوني الشباب التحت طلعو لي كلاشنكوف اديتم عشرين دولار، صاحوا معقول ده شغل التكسي؟ في النهاية فكوني. ولدها لحقني قالي امي طابخة شنو، قلت ليه براطيش قالي: ريلي؟ اي لوف براطيش.
جيت البيت عملت شاي… دورت الشريط لقيت نص فوريست قمب ونص عرس مها خضر في كوستي!
أها المعني
البني كجة بتلذذو بالحاجة دي
كلنا كان لقينا بنعملا
.
أحكي ليك قصة شريط مايكل جاكسون الرجع وفيه صديق سرحان؟