ليه يا البشير؟ الحكاية دي نهايتها شنو ومتين؟

كل عام والجميع بخير، وإن شاء الله العام القادم أحلى وأنضر مما كان العدو يتصور .

موقف غريب ومخجل قبل شويه في سوبر ماركت الأنفال بحي الرياض.. لافي بشتري في حاجات، وأنا أساساً نعسان وتعبان ومعاي بتي الصغيرة. حسيت انه في واحد مراقبني.. امشي يجي يقيف بعيد شويه.. اشيل حاجة يحاول يشوف الحاجة الجنبي.

أتحرك تاني يتحرك معاي.. بعدين زول ماشاء الله محترم.. بقيت أخت كل الاحتمالات بتخيل لي من تأثير الشربوت.. دفعتي في الثانوي، وحيفاجأني مجتبي بيرم ماعرفتني.. مشبهني بزول.. قايلني جزار داير يسوقني معاه.. المهم عملت نفسي ما شغال بالموضوع كتير.. شيلت حاجاتي، وماشي الكاشير، طوالي جا داهمني.. قولت بس ديل ناس الأمن الاقتصادي، حيصادرو حاجاتي لانه اي شيء بقا متوقع في بلاد النهرين.. اللحظه الابتسم لي ابتسامة جميلة قولت الحمدلله، واستعذت من الشيطان وسوء فهمي قالي: ممكن سؤال يا أبو الشباب بغريزة الآباء.. قولت الزول ده معناها حيقولي بتك دي مخطوبة.. طوالي جهزت الاجابه ياخ بتي دي صغيره لسع .

المهم تتوقعوا السؤال شنو؟ قالي: ابو الشباب انت حتحاسب كااااش، قولت ليهو: ايوه، قالي: معليش انا ححاسب ليك بالكرت بتاعي، وتديني كاش، لانه والله حق العيش ماعندي.

والله قربت ابكي: ليه يا البشير وصلتنا الدرجة دي، وعدمتنا حق العيش يوم العيد. ااااخ يابلد نحن ماشين لوين، والحكاية دي نهايتها شنو ومتين.. بالمناسبه الزول ده راكب لاند كروزر ٢٠١٧م.