الـGym الكَلكي.. الحلقة الأولى: “حرب الأَبيضين”

أكبر كارثة تواجه البشرية الآن،ليست(حرب الجنرالين)في السودان..
ولا (حرب إيران)..
المصيبة الكبيرة التي تهدد البشرية هي “السُكَر والمِلِح”،وإسم دلعهما (الأَبيضين)..!.
والأبيضان هما ربيبتا الموت المُفاجىء،
بالجلطة الدماغية
أو الذبحة الصدرية..!.
فالأولى تستهدف المُخ.
والثانية تستهدف القلب..!.
يعني بتجيب مِن الآخِر..!.
🩸💊🩸💊🩸💊🩸💊
قُمت يوم من الصباح كدا،وقلت يا ود ما تخش عالم (الريجيم) دا..!
والشجعني أكتر إنو في واحد كان قدامي في الجامعة،لغاية الآن ما عرس..!!.
أظنو راجي الري بالذكاء الاِصطناعي..!
🔹🔶🔹🔶🔹🔶🔹🔶
أولادي مولعون جداً ب(التخسيس)..!.
بيد أننا،ونحن في سِنهم – ولغاية الآن – بنأكل (أُم فِتفت والكبدة النية)،،
ب(الآتي)..!
أشك إنهم بيعرفوا (الآتي)..!!.
وهو الحاجة الدااااااافئة ال بتنزل مِن (بتاع) الخروف..!
خائف أقول (البول)،(أولاد الهوت دوق)ديل يضحكوا فيني،ويقرفوا مِني..!!.
♨️♨️♨️♨️♨️♨️♨️♨️
دا ما موضوعنا..!!.
المُهم؛
أنا قررت أدخل (صالة الجيم)..وهي مستويات ومراحل..
اِخترت (الجيم الكلكي)..
حيث قطعتو مِن رأسي..
نظام طيبات،بفهمي ..!.
فقررت الآتي:
– لا للسُكر.
– ⁠لا للملح.
– ⁠لا للغازيات.
– ⁠لا لدُعاة الحرب.
(الغازيات دي ما مقصود بيها المرأة الغازية)،،
عشان ما تفهمونا غلط..!!.
أنا قاصد بيها ناس البيبسي والكولا وأخواتهم.
وكفاية لغاية هنا..ما تعملوا لينا مشاكل مع المدام..!.
🤷‍♀️🙅‍♂️✌️♠️🤷🏼🔔
– في ريجيمي هذا،
في عامكم هذا،،
وفي شهركم هذا،،
وفي يومكم هذا..
اِستثنيت العشاء في الأفراح،وما يُقدَم في الأحزان(شاي باللقيمات) أو وجبات..
وتُستَثْنى ،كذلك،الدعوات الخاصة(طهورة،سماية،
حولية،عيد ميلاد،
كرامات،Dj ..الخ)..!.
أمشي أتعشى مع واحد(لا يُشترط أنْ يكون صديقاً)،كان عندو صداع،وبقى كويس..!.
لزوم مُجاملات،وكدا..!.
يعني البرهان براهو ال بيعدل في الوثيقة الدستورية..
أنا ذاتي بعدل في ريجيمي..!.
……………………………..
والحقيقة أنني،وبدون أية أسباب صحية – عشان الشمار ما يكتلكم – قررت أعمل ريجيم..!
بحثت عن (مراكز جيم)..
وقلت يا ود شوف أكتر واحد (جيمو)لطيف..!
فوجدت مركزاً له أجهزة ومُعدات،،تخليك (تقلب هوبا)،بدون ما تكسر رقبتك أو تِرقوتك أو (صُلبك)..!.
كما أنَّ هناك تمريناً،يخلي رجلينك تصل رقبتك (من ورا)..!!.
وممكن تعمل رياضة لنخرتك وأضانك،
وجضومك،وحاجات تانيه حامياني(بَطِلوا قلة أدب..!.).
رياضة كاااااااملة،وتغطية شاملة..!.
تصل اي حته في جسمك..!.
وأنا ما بفسر..
وإنت ما بتقصر..!.
لقد بدأت،بعد أنْ توكلت على الشديد القوي..!.
ونزلت للبرنامج تحت شعار (الجيم الكَلكي)..!.
🔴🔴🔴🔴🔴🔴🔴🔴
بدايتي كانت قوية جداً..
بطلت (الأبيضين)،السُكَر والملح،،لدرجة أنني رميت ملابسي الداخلية (النِكس والفنيلة أُم حمالات)،في القُمامة،
بسبب لونهما الأبيض..!!.
أما المشروبات الغازية،
فقد صارعتني،ولكني صرعتها..
ذلك أنني حينما أقف أمام ثلاجة في السوبر ماركت،أقف أمامها (خاضع ذليل)،،أفكر فيها وأتأمل..!.
النِفيسة ما ضعيفة ..!.
ولكنني اِنتصر عليها،في النهاية(بالكاد)..!.
مرة اِشتريت (كولا)..
زعلت من نفسي..
فشربت تلات أرباعها..ودَفقت عُشُرها ..!!
ما تسألوني كيف..؟!
دي حسابات صعبة عليكم..!بالذكاء الإستهبالصناعي..!.
🃏🃏🃏🃏🃏🃏🃏
أول أمبارح دخلت في أول اِختبار،وأنا في دعوة عرس..
جابو الصحن (ال ما خمج)..!
بديت ب(الباسطة)،،كيتاً ل(المِلح)..!
فالأبيضان مثل الهلال والمريخ..!.
حا أوضح ليكم دي في الحلقة الثانية(بِلوا الصبُر)..!!.
♠️♠️♠️♠️♠️♠️♠️♠️
“الريجيم” صعب..
“والجيم” مااااااا بطال.
🔔🔔🔔🔔🔔🔔🔔
ولكن تبقى حكمة أُمي،رحمها الله،حاضرة في ذهني..
فحينما كنتُ أقول لها:
أبعدي مِن السُكَر والملح،يا أُمي،..
كانت تقول لي:
“المسيخ دا،الله لا دخلو بيتي..!.”.
❗️❗️❗️❗️❗️❗️❗️❗️
أنا الآن في الاِسبوع الأول لعملية (تجوعون)..
أحس ببرهان وحميدتي أفضل مِني بكتيييييييييير..!.
فهُما يتعاركان على (الأُبيض)..
بينما أنا لوحدي أحارب (الأَبيضين)..!.