عن حمودي الشِبلي أكتب لكم

عن حمودي الشِبلي أكتب لكم
  • 20 فبراير 2022
  • لا توجد تعليقات

د. عصام محجوب الماحي

واقف في تقاطع البلدية مع القيادة منتظر الاستوب يفتح.. جاني الحبيب ده (مرفق صورته أدناه) قالي اشتري مني قصص.
قلته ليه شكرا.
قالي طيب ماشي علي استوب النحله؟
قلته ليه اي.
قالي ممكن اركب معاك؟
قلته ليه اتفضل.

  • اتونست معاه.. ولد بشوش وشايل هم امه.. قلته ليه بتجيب بضاعتك دي من وين؟
    قالي بشتريها من بتاع المكتبة ويبيعها في التقاطعات.
    قلته لي ماتشتغل مناديل؟
    قالي المناديل كنا بنبيعها بي 200 ج لكن جو ناس خربو السوق علينا بقو يبيعو تلاته مناديل بي 500 ج بقينا مابنقدر نبيع ومره نرجع خسرانين.
    قلته لي ساكن وين انت؟
    قالي ساكن امبده.
    قلته لي طيب المواصلات ماشي وجاي بتغطي معاك؟
    قالي مواصلات 2700 ج ماشي وجاي بفضل لي 2100 ج بديها لي أمي.
    قلت ليه امك شغاله.
    قالي كانت شغاله تسالي وفول في السوق العربي لكن خلّته.
    قلته ليه لي؟
    قالي المواصلات بقت غاليه.
    قلته ليه اسي انت مكانك الاساسي وين؟
    قالي تقاطع طلمبة النحله بعد الساعة 11 الزحمة بتجي بنقدر نشتغل.
    قلته طيب ممكن أصورك واكلم ليك ناس الفيس وأصحابنا لو جو هنا يشترو منك؟
    قالي طوالي.. قوليهم بتلقو حمودي الشبلي شايل القصص الوحده بي 200 ج.
    قلته خلاص بكلمهم ليك.. اسي اديني وحده وخليها معاك.
    قالي لالا بديك ليها مجان.
    ضحكت وقلته ليه ياحمودي يعني انت حسبتها حقت التوصيله؟
    قالي لا حقت الدعايه.
    قلته ليه انت تستاهل أي خير ربنا يوفقك ويحفظك.
  • ماتنسو حمودي ياناس.
    اسمر النيل
    لا ادري من هو صاحب البوست أعلاه الذي لاقاني في قروب (واتساب) لكنني سأقوم أيضا من ناحيتي بتدويره مساهمة في التعريف بصاحب الصورة المرفقة أدناه أو قُل الدعاية له لتسويق بضاعته كما فعل مشكوراً صاحب البوست (اسمر النيل).
    أرجو أن تدعمه حيثما وجدته فانه مشروع خبير تسويق – ماركيتينق – بس كيف يقدر يدرس ومن يأخذ بيده للمدرسة؟ مكانه فصولها وليس الشوارع وتقاطع الطرق.. أو ليجمع بينهما، بين المدرسة وبين كيفية ممارسة مسؤولياته تجاه والدته واسرته ونفسه.. فيا لها، في غياب الدولة، مِن مسؤوليات عندما يتولاها مَن في عُمْرِ حمودي الشبلي.
    عصام محجوب
    بوخارست – رومانيا
    19 فبراير 2022

التعليقات مغلقة.