تاااااني العلمانية

قبل ما أبدأ المقال ده داير اي زول حاسس انه دينه نقص بعد ذهاب الانقاذ يرفع اصبعه يقول انا….
— اي زول كان متوقع حكومة أمير المؤمنين تدخله الجنة يقول انا…
— اي زول خايف الكفار ديل ومعاهم ناس الحلو و ياسر عرمان يدخلوه النار يرفع اصبعه..
— انتوا عارفين مشكلتنا شنو في السودان ((أو ارض الميعاد )).. انه اي زول بيعتبر هو متدين وخايف علي الناس الآخرين انه ديننهم ينقص وينحرفوا …
ودي كانت معضلة الاسلامويين الحكموا السودان واسلاموين دي مهمة لانها تعني رفع شعار الاسلام في كل المعاملات و تغطيتها بدثار الدين…
فلا هم يصلون اكتر من باقي الشعب ولا بخافوا من الله اكتر منه الشعب ولا طبقوا أمر الله في روحهم وتنظيمهم اكتر من الشعب…. فهم أكثر من سرق وأكثر من قتل وأكثر من ظلم وأكثر اعتدي عندما كانوا قائمين علي الامر…
طيب يا أخوانا شابكننا فصل الدين عن الدولة هو وينوا الدين الخلوهوا لينا اهلنا ديل و وينها الدولة ذاتها …..
— خلونا نبدأ بالدولة :
الحكومة دي ورثت دولة تلتها اتفصل في الجنوب و جزء محتل من اثيوبيا وجزء من مصر و اريتريا كانت عينها علي كسلا و تشاد قبل كده تحت قيادة حركة العدل والمساواة مدرعاتها دقت لحدي كبري النيل الابيض علي بعد كيلو من القصر الجمهوري….
— ذهبت الانقاذ وتركت ستة وعشرين حركة مسلحة كلها كانت تناوش القوات المسلحة ولم تستطع أن تحتل مدينة كبيرة وهذا وسام شرف في جبين القوات المسلحة يجب أن نفتخر به نحن كمواطنين لا ينتمون الا للوطن بما في ذلك ناس دارفور الغير منضمين لاي حركة مسلحة…
وهناك خطأ كبير ان يظن الناس ان أبناء دارفور جميعهم مقسمون في ولائهم لهذه الحركات والحقيقة المرة أن هذه الحركات هي من قتلت أبناء دارفور تحت ذريعة كتلت اهلي بكتل اهلك…. حرقت حلتنا بحرق حلتكم وحلة حبوبتك…وهذا الفهم القاصر هو الذي يخيف سكان الخرطوم..
— الايام دي ناس كتار خايفين لانه الحركات المسلحة دخلت الخرطوم بعد سقوط الإنقاذ… وطيب مالو ما يدخلوا؟؟؟؟؟
الخرطوم لم يدخلوها بعد معارك في تخوم الخرطوم وللا دخلوها فاتحين….الخرطوم دي دخلوها بعد ما المدنين الماشايلين سلاح امنوها ليهم وطردوا الانقاذ و نفس الناس ديل قادرين يطلعوا اي حركة مسلحة تعمل حركات ماكويسة و مافي حركة من ال 26 حركة دي اقوي من الانقاذ الكانت متحكمة في الجيش والشرطة والامن والاستخبارات و مدعومة من التنظيم الإسلامي العالمي والداخلي….ولو في حركة متخيلة انها اقوي من الشعب خليها تستفزوا و تشوف الحيحصل ليها شنو …بلا حركات بلا كلام فارغ وبالمناسبة هم ذاتهم عارفين الرتب العسكرية اللابسنها دي أمام أصغر رتبة من القوات المسلحة ذي الدهب الفالصو مع الدهب الأصلي الواحدة تكون لابساهو يكشكش لكن لو دخلتو السوق كوز موية ما بجيبو ليها (( اقصد كباية موية ))…
— انا الان اكتب من كسلا ضمن قافلة جراحية لبنك الثواب وما احزنني جدا ان تسمع ان بعض الحركات المسلحة دخلت في تحالفات مع قبائل شرق السودان و بعضها تبيع الرتب بالقروش …. يعني خمسين مليون ممكن تاخد عميد بي كلاشك و دبابيرك و لو تميتها مية مليون عادي ممكن تاخد لواء ومعاهو اتنين دوشكا ….
و ده ذاتو بيان بالعمل للشعب السوداني انه دي رتب فالصو….
دي يا اخوانا الدولة الدايرين يفصلوا منها الدين….
—- نجي للدين بتاعنا كسودانين
ودي ذكرتني قصة جدنا العلًام في حلتنا….
جدنا العلٌام اكبر زول في حلتنا سمي بالعلام لانه الوحيد من جدودنا القرأ خلوة و اعرفهم بكتاب الله ومع ذلك اقلهم دينا علي ارض الواقع (( ربنا يمد في عمره ويحفظه من الكرونا وناس انت لسه جدك حي و يكرمنا بي جاهو لاننا نعتبره من عباد الله الصالحين ))…
— قال ليه (( العلام )) يا ولدي ما تسمع شيخ فلان وشيخ علان… حلتنا دي كلها ما كان فيها زول بصلي غير جدك المنصور ود خالد و مافي زول ما بيسكر غيره و مافي زول عنده دين…. وما يقولوا ليك كانوا حنينين الناس ديل يا ولدي اقسي من ابي لهب ذاتو … والله يا ولدي انا قطاعة العيش راحت مني في الترعة ابوي جلدني جلد بي حبل الحمار لمن جسمي جاب الدم….
— قال ليه اها يا جدي العلام ان شاء الله صرفت ليهم بركاوي؟؟
— قال ليه اصرفلهم شان شنو يا ولدي انا قلت ليك ديل اصلا ما كان عندهم دين اسب ليهم شان شنو ؟؟؟…
هسا يا اخوانا البلد دي حقيقة قبل الحكومة الانتقالية لا كان فيها دولة ولا كان فيها دين عشان نقول دايرين نفصلهم….
امير المؤمنين عمر البشير بي عضمة لسانه قال صرف بركاوي لسفيرة بريطانيا وكل الشيوخ ديل قاعدين واحد قال ليه سبيت الدين يا مؤمن مافي …. كلهم كانوا قاعدين ويأكلوا في الجداد المحمر ويغمتوا في الظروف المستقطعة من قروش المساكين …. حاويات المخدرات تدخل وتمرق ذي مادايرة ستات العرقي شغالات البلدوزرات شغالين ردم اربعة وخمسة بنات في نهار رمضان هو الدين ده كان وين يا أخوانا فهمونا قبل ما يفصلوهوا من الدولة…. ما تخلونا نكتب باقي الكفاوي وبرضو بنقول مافي زول معصوم والله كفيل بي عباده ((و سبل الضلالة والهدي اقسام ))…
— يا اخوانا في ناس متخيلين العلمانية دي حزب ذي حزب الأمة والاتحادي والشيوعية..و في ناس متخيلنها دين ذي النصرانية البوذية و الهندوسية…
يا اخوانا افهمووووووووا
العلمانية نظام حكم فقط ممكن يكون حكم دكتاتوري عسكري ذي حكومة مصر الان وذي حكومة نميري قبل تلاتة وتمانين وذي حكومة عبود وعبدالله خليل (( سؤالي الشعب السوداني ده كان قاعد زمن عبدالله خليل و عبود و نميري وللا الجماعة الفوق ديل حكموا في مملكة نبتة!!!!!! ؟؟؟؟؟…
— العلمانية ممكن تكون حكومة ملكية ذي مملكة الأردن و الملك بتاعها جده الرسول طوالي بدون كضب و تذوير انساب…
— العلمانية ممكن تكون حكومة ديمقراطية ذي حكومة تركيا الآن…. الهرب ليها الشيوخ الانقاذيين الآن وهم يدعون لحكومة إسلامية تحارب العلمانية …
–‘ العلمانية يا اخوانا ما بتمنعك انك تصلي بالقرآن كله في ركعة واحدة في اي محطة عامة أو مسجد أو رأس بيتك لكن بتمنعك تشيل ليك صوت تدق مواطن أو انسان غيرك وغير ولدك وتقول ليه ما صليت مالك….
— العلمانية يا اخوانا ما بتمنعك تربي دقنك أو تحلق شاربك أو تلبس مراتك وبناتك برقع أو نقاب لكن بتمنعك تركب بنت ناس في بوكسي أمنجية وتوديها القسم و تجلدها لأنها لابسة بنطلون أو تيشيرت ضيق…
بصريح العبارة العلمانية بتقول ليك طبق دينك في نفسك وفي اهل بيتك و ركز في ورقك وخلي ورق الناس التانين لانه الله ذاتو ما بسالك الا من نفسك…
— يا اخي لو انت شايف انه ولدك يفترض يحفظ خمسين سورة في سنة اولي أساس ولدك قاعد والمصاحف متوفرة ومن ما يرجع من المدرسة لحدي صباح بكرة عندك سطاشر ساعة اقعد حفظه ان شاء الله يبقي فكي ولو ناس المدرسة شاكلوهوا شيل بندقيتك وأعلن فيهم الجهاد ونحن معاك….لكن ليس من حقك تفرض علي كل اطفال السودان حفظ تلاتين سورة في سنة اولي ….
رسالة لأولادنا الشباب:
ما تسمعوا الكضب البقولوا ليكم ده انه الشعب السوداني ده متدين وأهل تقابة و جاهدوا في سبيل الله … دي اكبر كضبة في التاريخ قروكم ليها ….لحدي قريب من الزمن الحلة كلها فيها زول واحد بيقرا ويكتب و بصلي بالناس وزول حافظ قرآن مافي … يعني 99% من جدودكم مباشرة يعني جدودكم بيكون شالوكم في صفحتهم ما كان بيعرفوا دين ولا حافظين قرآن و حبوباتكم ديل كوم براهو فيهن واحدات لما نسالهم بتقولن شنو في الصلاة بيقولن بنقول (( الصلاة صلاتك نقوم و نقع علي واطاتك و نكبر الله اكبر ))….
— المهدي ذاتو ما كان مجاهد لان حربه كانت ضد أمير المؤمنين في تركيا و معظم القتلهم مسلمين مصرين واتراك و سودانيين وبذلك المهدي بطل قومي سوداني قاد تمرد ضد الإمبراطورية العثمانية الإسلامية التي نفتخر بيها احيانا كسودانين ونقول نحن المسلمين احتلينا اوربا (( عليكم اقروا التاريخ ده بعيدا عن المنهج المقرر وبي ذهن مفتوح لتقبل الحقيقة و بدون قدسية علي من صنعوهوا …..
وانا معجب بالمهدي كبطل قومي سوداني صنع للسودان تاريخا حديثا وقاد السودانيين لانتزاع سيادتهم الوطنية من التبعية لأمير المؤمنين في تركيا وما العيب في أن يحدثنا استاذ التاريخ بهذه المفخرة الوطنية بتجرد دون تحريف التاريخ……….
وآخر حاجة بقولها ليكم يا شباب ما تصدقوا الكضابين و قالوا اصلا الكضاب ده واحد من اتنين:
يا زولا غريب وبلده بعيد أو كبيرا ما عنده نديد…كده عرفتوا البكضب منو..
اقسم بالله بي شعركم المفلفل ده و بناطلينكم الناصلة دي انتوا دينكم احسن من دين اجدادكم و ابواتكم ذاتهم…..
وانا اتحدي اي زول يمشي في الشارع ده ويقبض الناس الكبااااار ديل بي بروفاتهم و دكاترتهم واساتذتهم و يسالهم في حفظ قرآن كان يلقاهم حافظين غير سورة الفاتحة وتلاتة اربعة سور صغار و ذاته حفظ بدون تجويد وقراءة معظمها ركيك و كله لحن….

معا لإعادة قراءة الواقع والتاريخ… //////////

ومن كسلا ارسل عاطر التحايا لزملائي الذين يحتفلون بالعيد الذهبي لمدرسة الحوش الثانوية التي امضينا فيها أيام الصبا وبداية الشباب…وفي نيالا سوف نلتقي نحن وأبناء دارفور والحركات المسلحة:

كل أجزائه لنا وطن
إذ نباهي به ونفتتن
نتغنى بحسنه أبدا
دونه لا يروقنا حسن
حيث كنا حدت بنا ذكر
ملؤها الشوق كلنا شجن
نتملى جماله لنرى
هل لترفيه عيشه ثمن
خير هذي الدماء نبذلها
كالفدائي حين يمتحن
تستهين الخطوب عن جلد
تلك تنهال وهي تتزن

ودمتم سالمين
4/4/2021
استشاري جراحة الكلي