عايز أشوفك ألف مرة بين الفلاتية والسر قدور

حكى الفنان السر أحمد قدور انه كان يسكن فى الشهداء بام درمان بمنزل مؤجر مع الفنان العاقب محمد حسن و انه كان مكانا متميزا للقعدات الجميلة ..

لحن العاقب من كلمات السر قدور الاغنية الرائعة يا حبيبى نحن اتلاقينا مرة و قام شاعرها السر قدور باهداء الاغنية الى الفنانة عائشة الفلاتية و على مدى اسبوع كامل تغنت بها بصوتها الشجى الجميل و لكن
فى ذات امسية طالب الفنان العاقب صديقه السر قدور باعادة اغنيته اليه و ما كان من السر الا ان ذهب الى الفنانة عائشة و قال لها :–
انتى بت فتاة و لسه ما اتزوجتى كيف تغنى اغنية بتقول عايز اشوفك الف مرة ؟
انا حاديك اغنية تانية احسن منها ..
الشاهد و حسب رواية الفنان السر قدور فان تلك الاغنية غناها العاقب محمد حسن من الاذاعة و نالت الاعجاب و صار الناس يرجون سماعها بصورة متكررة فى برنامج ما يطلبه المستمعون و ادى ذلك الامر بالطبع الى غضب و زعل الفنانة عائشة

بعد عدة اشهر و بينما السر قدور جالس داخل مبانى الاذاعة السودانية فى ذلك الزمن اللطيف الجميل مع بعض العازفين و الفنانين ، مرت الاستاذة الفنانة عائشة بالمكان الذى هم يجلسون فيه و خاطبت السر قدور :—-
انعل ابوك يا السر قدور انت و عوض جبريل

ضحك الجمع المتواجد و لكن السر سالها ضاحكا :—
انا عرفت انعل ابوى ليى ، لكن عوض جبريل ذنب ابوهو شنو ؟
ردت عليه الفنانة عائشة الفلاتية :—

عشان (شين ) زيك.