نحن معاكم : مليونية 26 فبراير2022
يا هداي في ليل الضلمة
شد الهمة
ساري الليل
بين نجمة ونجمة
حادي حداكم
قوم من حلفا
امسك الدفة
غني مع الرواسا
الالفة
حيي تروس اللفة
يا عاطف دمك ما جفا
دنقلا للدبة ضراكم
يا راكب سرج الوطن الجامح
يا الشفاتي
الرابح
و فالح
امك مارقة تنافح
ظلم همباتي
لابس كاكي
ويا كنداكة ابوكي معاكي
بي قدامكم ومره وراكي
والله معاكم
حبل العروة الوثقي الواضح
سيف الكضب
النابي
الصابي
ماب يقطعنا
ومابيختاكم
النيل والخور والفولة
تروي املنا
بثورة و معنى
قبل افوله
ودم شهيد غدرا مهدورا
مابننساهو
وراه و وراكم
الجابرية تحي الثورة
حرية سلام و عدالة
هتافها صداكم
لا تضهب من ولدك
يا العوني
ضايقي الزومة
ونوري الصامدة
عارفة لزومة
مارقة معاكم
ضد حكومة
جات مهزومة
قلبت موجة الرادي
وصدت لامن صدت
ما اتعدت
بقت مأزومة
وماها معاكم
فقرنكتي كورتي كريمة
حضارة قديمة
على المحبوب
صلاتن ديمة
حاج الماحي حادي سراكم
الطيب ود صالح جاكم
حميد ما غاب من عينكم لحظة
هناااك يرجاكم
يا موقد نار يا منصوري
اركب لوري
اضرب بوري
الحق ناس مقرات
في بربر
قطر الثورة الحل وصفر
مابيرجاكم
عطبرة ماخابت من يومه
وشوف مريومة
وناس احمد
وخالتك فطومة
عقدوا النية
ضربة نجلا المو مكرية
مع هندوية
بقبضة قوية
عدلت السارية المتكية
وابوك في شندي
راجي لماكم
وفي خرطوم الازرق وابيض
وام درمان النيل
طلة وجه جميل
في بحري الدنيا اصيل
كنداكاتنا تعدلوا الميل
يا شفاتي شيل الشيل
يا مقداد تِب
شد الحيل
اوع تميل
امك واختك
وحتى ابوك الحملو تقيل
في الستين الله يرعاكم
فوق الترس الولع بدري
الهمباتي يلفح ويجري
قصر العلم الرفرف نصري
احتلوه ولاد المكري
اسماعيل قال نفذوا امري
يمرقوا هسع
ويبقى مروقن
يا هو مناكم
وكل سودان العزة المدني
لاعن مدني
ورا سنار
ناس مكي ومدني
جنوبنا الضاع
وسمم بدني
كله معاكم
يامكتول في حوش برهانك
فك سجانك
ومدو لسانك
يا الزين زغرد
ورو…. روووك
عرسك قرب
الله معانا ونحن معاكم
لاينسانا ولا ينساكم
عاوز اطير بجناحي الواحد
الله شاهد
وعبدالواحد
من فاشر السلطان الماجد
جايي يجاهد
خاشي معاكم
و من ريح طوكر
جات سفاية
جابت شيخ رافعلنا راية
بشر وهز في الحلفاية
السودان بي شرقو وغربو
السفاح مو خايف ربو
مابيغلبو… مابيغلبو
نحن حداكم
منصورين وربي معاكم
لا تهتم بالبحصل وحاصل
باكر كل الشعب يواصل
ثورة تخط الحد الفاصل
بين الحق والوهم الباطل
نحن معاكم
النور المالي سماكم
فجر الامل الضوه سناكم
برضو معاكم
روحي فداكم
يا محمود
الله يرعاكم
عبدالمنعم العوض
مليونية 26 فبراير 2022م
